Chhota Udepur: જન. હૉસ્પિટલમાં બેડને બદલે જમીન ઉપર અપાતી સારવાર
છોટાઉદેપુર જિલ્લાની સૌથી મોટી જનરલ હોસ્પિટલમાંથી શરમજનક અને ચિંતાજનક દ્રશ્યો સામે આવ્યા છે. હોસ્પિટલમાં સારવાર અર્થે આવતા દર્દીઓને બેડ ન મળતા જમીન પર જ સૂઈને સારવાર લેવાની ફરજ પડી છે. ગામેગામથી આશા લઈને આવતા ગરીબ દર્દીઓને બેડ વગર જમીન પર સૂવડાવીને બોટલ ચઢાવાઇ રહ્યા હોવાનો વીડિયો સોશિયલ મીડિયામાં વાઇરલ થયો છે. 200 બેડની હોસ્પિટલ હોવા છતાં દર્દીઓ માટે જગ્યા કેમ નથી ? તેવા સવાલ ઉઠયાં છે.છોટાઉદેપુર જિલ્લાની સૌથી મોટી જનરલ હોસ્પિટલના વોર્ડમાં બેડ ખાલી ન હોવાથી દર્દીઓ ઠંડા ફ્લોર (જમીન) પર સૂવા મજબૂર બન્યા છે. દૂર-દૂરના ગ્રામ્ય વિસ્તારોમાંથી વિવિધ બીમારીઓના ઇલાજ માટે આવતા ગરીબ અને સામાન્ય દર્દીઓને યોગ્ય સગવડ આપવાને બદલે જમીન પર જ પાથરણાં પાથરીને સારવાર અપાય છે. ગંભીર સ્થિતિમાં આવેલ દર્દીઓને જમીન પર સૂવડાવીને જ બોટલ (ગ્લુકોઝ) ચડાવાઇ રહ્યા છે, જે તંત્રના મોટા-મોટા દાવોઓની પોલ ખોલે છે. કહેવા માટે તો આ છોટાઉદેપુર જિલ્લાની 200 બેડની સગવડ ધરાવતી સૌથી મોટી હોસ્પિટલ છે. તો પછી સવાલ એ ઊભો થાય છે કે દર્દીઓને બેડ કેમ નથી મળી રહ્યા ? શું હોસ્પિટલમાં દર્દીઓની સંખ્યા ક્ષમતા કરતાં વધી ગઈ છે ? અથવા ઉપલબ્ધ બેડની યોગ્ય વ્યવસ્થા કરવામાં તંત્ર નિષ્ફ્ળ નીવડયું છે ? સિઝનલ બીમારીઓ અને રોગચાળાના કારણે ગ્રામીણ વિસ્તારમાંથી રોજના સંકડો દર્દીઓ અહીં આવે છે. પરંતુ 200 બેડની હોસ્પિટલમાં સુવિધાનો અભાવ જોવા મળતા દર્દીઓ અને તેમના સગાં-સંબંધિઓ ભારે રોષ અને મુશ્કેલીનો સામનો કરી રહ્યા છે. સરકાર આરોગ્ય ક્ષેત્રે કરોડો રૂપિયાના બજેટ અને અત્યાંધુનિક સુવિધાના દાવો કરે છે, પરંતુ છોટાઉદેપુરની આ હોસ્પિટલના દ્રશ્યો વાસ્તવિકતા કંઈક જુદી જ બતાવે છે. વીડિયો વાઇરલ થયા બાદ હવે ઉચ્ચ અધિકારીઓ શું પગલાં લે છે તેના પર સૌની નજર છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
