આજથી વરસાદની આગાહી, મોતને આમંત્રણ આપતાં VMCનાં ખાડાઓ
શહેરમાં એક સાથે ઠેરઠેર ખોદકામો કરીને કોર્પોરેશને પહેલાથી જ બુદ્ધીનુ પ્રદર્શન કર્યુ હતુ. એવામાં મ્યુનિ.કમિશનર અરૂણ મહેશ બાબુએ તા.31મી મે પહેલા આ કામો પૂર્ણ કરી દેવાની આપેલી સૂચનાઓને જાણે અધિકારીઓ ઘોળીને પી ગયા છે. જેથી આવતીકાલે ડેડલાઈન પૂર્ણ થઈ રહી છે, પરંતુ શહેરમાં ઠેરઠેર ખોદેલા ખાડાઓ હજૂ યથાવત છે. આવતીકાલથી 50-60 કિ.મી.ની ઝડપે વાવાઝોડા-વીજ કડાકા સાથે વરસાદ પડવાની હવામાન વિભાગની આગાહી વચ્ચે કોર્પોરેશનના ખાડાઓ મોતને ખુલ્લુ આમંત્રણ આપશે.પાણીની લાઈનો, ડ્રેનેજની લાઈનો, વરસાદી ગટરો વિગેરે કામો તો કોર્પોરેશનના રૂટિન કામો છે, પરંતુ કોણ જાણે કેમ કોર્પોરેશનના તંત્રને એક સામટા કામો હાથ પર લેવાની બુદ્ધી સુઝી અને ઠેરઠેર ખોદકામો કરી નાખ્યા. શહેરનો કોઈ એવો રોડ બાકી રાખ્યો ન હતો કે જ્યાં કોઈને કોઈ કારણસર ખોદી નાખ્યુ ન હોય. આ ખોદકામોને લઈને ટ્રાફિક ડાયવર્ટ કરાતા પબ્લિક મહિનાઓથી પરેશાન હતી, પરંતુ હવે તેમની પરેશાની વધશે તેવુ લાગી રહ્યું છે. દર અઠવાડીયે મ્યુનિ.કમિશનર અરૂણ મહેશ બાબુ રીવ્યુ બેઠક લે છે અને કયુ કામ કેટલે સુધી પહોંચ્યું ? તે સતત પૂછે છે તેમજ તા.31મી મે પહેલા આ બધા જ કામો પૂર્ણ કરી દેવાની તેમણે સૂચનાઓ પણ આપી હતી. તેમ છતાં કોર્પોરેશનના વિવિધ વિભાગો, ઝોન, વોર્ડના અધિકારીઓ જાણે શેઠની શિખામણ ઝાંપા સુધી હોય તેમ કમિશનરની સૂચનાઓને ઘોળીને પી ગયા હતાં. કમિશનરે તો નવા કામો હાથ નહીં ધરવાની પણ સૂચનાઓ આપી હતી, તેમ છતાં કોઈને કોઈ ઠેકાણે નવુ ખોદકામ કરી જ રહ્યાં છે. આવતીકાલે તા.31મી મે છે અને કમિશનરે આપેલી ડેડલાઈન પૂર્ણ થઈ રહી છે, તેમ છતાં પણ હજૂ મોટાભાગની જગ્યાઓ પર કામો પૂર્ણ થયા નથી અને ખાડાઓ રસ્તાઓ પર અડગ છે. કામો પૂર્ણ નહીં થતા ખાડાઓ જૈસે થે પરિસ્થિતિમાં છે. હવે જ્યારે હવામાન વિભાગે આવતીકાલ તા.31મી મે થી જ 50 થી 60 કિ.મી.ની ઝડપે વાવાઝોડા અને વીજ કડાકા સાથે વરસાદ પડવાની આગાહી કરી દીધેલી છે. ત્યારે આટલી ઝડપે વાવાઝોડુ ફૂંકાશે તો કોર્પોરેશને ખોદેલા ખાડાઓની આસપાસમાં જે માટીના ઢગલાઓ કરાયા છે, તે માટી રસ્તાઓ પર ઉડશે અને રહેણાંક વિસ્તારના લોકો તેમજ વેપારીઓની મિલકતોમાં ધૂળ ઘૂસી જશે. તેમજ વાહનચાલકોએ સૌથી વધુ પરેશાનીનો સામનો કરવો પડશે. એટલુ જ નહીં, હવામાન વિભાગે કરેલી આગાહી મુજબ જો આવતીકાલથી જ વરસાદ શરૂ થઈ ગયો તો આ માટીના ઢગલાના કારણે રોડ પર ઠેરઠેર કાદવ- કીટચનુ સામ્રાજ્ય સર્જાશે. તેમજ ખોદી નાખેલા ખાડાઓ મોતને ખુલ્લુ આમંત્રણ આપશે. કમિશનરે બેઠકોમાં સૂચનાઓ આપી હોવા છતાં પણ સંબંધીત અધિકારીઓના પેટનુ પાણી હલ્યુ નથી અને આજે પરિસ્થિતિ એવી છે કે ડેડલાઈન આપવા છતાં પણ ખાડાઓ યથાવત છે. ત્યારે પહેલા ટ્રાફિક ડાયવર્ઝનથી હેરાન થતી પબ્લિકે હજૂ ઘણુ બધુ સહન કરવાનો વારો આવશે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward