બનાસકાંઠા જિલ્લાના ગઢ વિસ્તારમાંથી રૂ.19.72 લાખના શંકાસ્પદ ઘી અને પીકઅપ ડાલા સાથે એક શખ્સ ઝડપાયો
ગુજરાતના લોકોના રસોડામાં શૃદ્ધતાના નામે કેમિકલયુક્ત અમૃત પીરસતા તત્વો સામે બનાસકાંઠા એસ.ઓ.જી.એ લાલ આંખ કરી છે. સામાન્ય નાગરિકો જ્યારે મોંઘવારીમાં ઘી ખરીદતા પહેલાં સો વાર વિચારે છે ત્યારે બનાસકાંઠાના કેટલાક શખ્સો રાતોરાત અમીર બનવા માટે શંકાસ્પદ અને નકલી ઘીના ડબ્બા ટ્રાન્સપોર્ટ કરવામાં વ્યસ્ત છે પરંતુ આ વખતે તેમનું આ ચીકણું પ્રકરણ પોલીસની બાજ નજરમાંથી બચી શક્યું નથી.બનાસકાંઠા એસ.ઓ.જી. ટીમ ગઢ પોલીસ મથક વિસ્તારમાં પેટ્રોલિંગમાં હતી તે દરમ્યાન બાતમી મળી હતી કે એક પીકઅપ ડાલામાં સ્વાસ્થ્ય સાથે ચેડાં કરતું શંકાસ્પદ ઘી સપ્લાય થવાનું છે. પોલીસે તુરંત જ સામઢી મોટાવાસથી આસેડા જતા રોડ ઉપર કેનાલ પાસે વોચ ગોઠવી હતી. ત્યારે શંકાસ્પદ પીકઅપ ડાલા આવતા તેને રોકી તલાસી લેવામાં આવી હતી અને પીકઅપ ડાલામાંથી અલગ અલગ માર્કાના 15 કિલોગ્રામના કુલ ડબ્બા નંગ 176 કિ.રૂા.16,72,000 તથા શંકાસ્પદ ઘીની હેરાફેરીમાં ઉપયોગમાં લેવાયેલ પીકઅપ ડાલા કિ.રૂા.3,00,000 કુલ મળી કિ.રૂા.19,72,000નો મુદ્દામાલ સાથે પીકઅપ ડાલાના ચાલક જામસિંગ જાલમસિંગ સોલંકી રહે.સામઢી મોટાવાસની અટકાયત કરી હતી. બનાસકાંઠા જિલ્લો એટલે દૂધ અને શુદ્ધ ડેરી પ્રોડક્ટ્સની ભુમિ. પરંતુ કેટલાક કમાઉ દીકરાઓએ આ ભૂમિને નકલી ઘીનું મેન્યુફેક્ચરીંગ હબ બનાવવાની સોપારી લીધી હોય તેમ લાગે છે. સવાલ એ થાય છે કે જ્યાં સુધી આ નકલી ઘી બનાવતી અસલી ફેક્ટરીઓ અને તેના માલિકોના ગળા સુધી કાયદાનો હાથ નહિં પહોંચે ત્યાં સુધી શું જનતાના સ્વાસ્થ્ય સાથેના આ ખેલ બંધ થશે ખરા ! ગુજરાતના વધુ સમાચાર વાંચવા માટે ક્લિક કરો
Read Full Story arrow_forward