Gir Somnath: ખંઢેરી ગામે સૌરાષ્ટ્ર સિમેન્ટના વિસ્તરણ પ્રોજેક્ટની લોકસુનાવણીમાં સમર્થન અને વિરોધ વચ્ચે માહોલ ગરમાયો
ગીર સોમનાથ જિલ્લાના સુત્રાપાડા તાલુકાના ખંઢેરી ગામે સૌરાષ્ટ્ર સિમેન્ટ કંપનીના માઇનિંગ વિસ્તરણ પ્રોજેક્ટને લઈને યોજાયેલી પર્યાવરણીય લોકસુનાવણીમાં ભારે ગરમાગરમી જોવા મળી હતી. આ લોકસુનાવણીમાં કંપનીના સમર્થન અને વિરોધ વચ્ચે સ્થાનિક રાજકારણ અને પર્યાવરણના પ્રશ્નો આમને-સામને આવી ગયા હતા. આ મહત્વપૂર્ણ સુનાવણી જિલ્લા ઇન્ચાર્જ અધિક કલેક્ટર યોગેશ જોશીની અધ્યક્ષતામાં કાયદો અને વ્યવસ્થાની સ્થિતિ વચ્ચે યોજાઈ હતી.ભાજપના સ્થાનિક દિગ્ગજ નેતાઓએ ખુલ્લો ટેકો જાહેર કર્યો આ બેઠકમાં મુખ્યત્વે સૌરાષ્ટ્ર સિમેન્ટ કંપનીની લાઈમસ્ટોન (ચૂનાના પથ્થર) ની ઉત્પાદન ક્ષમતા વાર્ષિક ૦.૧૪૪ મિલિયન ટનથી વધારીને ૧.૦ મિલિયન ટન સુધી કરવાના વિસ્તરણ પ્રસ્તાવ પર વિસ્તૃત ચર્ચા થઈ હતી. આ પ્રોજેક્ટના માઇનિંગ વિસ્તરણને ભાજપના સ્થાનિક દિગ્ગજ નેતાઓએ ખુલ્લો ટેકો જાહેર કર્યો હતો. જેમાં સ્થાનિક ધારાસભ્ય ભગવાન બારડ, પૂર્વ કેબિનેટ મંત્રી જશાભાઈ બારડ તેમજ ભાજપના પ્રદેશ નેતા માનસિંગ પરમાર સહિતના અગ્રણીઓ કંપનીના સમર્થનમાં આગળ આવ્યા હતા. ભાજપના આ નેતાઓએ દલીલ કરી હતી કે આ વિસ્તરણથી વિસ્તારમાં ઉદ્યોગોનો વિકાસ થશે અને સ્થાનિક યુવાનોને રોજગારીની નવી તકો પ્રાપ્ત થશે. પ્રોજેક્ટનો સ્થાનિક સ્તરે ઉગ્ર વિરોધ પણ નોંધાયો બીજી તરફ, આ પ્રોજેક્ટનો સ્થાનિક સ્તરે ઉગ્ર વિરોધ પણ નોંધાયો હતો. ભેટાળી ગામના સરપંચ, ઉપસરપંચ અને કોંગ્રેસના તાલુકા પ્રમુખ હિરેન બમરોટીયા સહિતના આગેવાનો અને ગ્રામજનોએ કંપની સામે સવાલ ઉઠાવ્યા હતા. વિરોધ કરી રહેલા લોકોએ ચિંતા વ્યક્ત કરી હતી કે, માઇનિંગ ક્ષમતા વધવાથી પર્યાવરણને મોટું નુકસાન થશે, ધૂળનું પ્રદૂષણ વધશે અને ખેતી સહિત પીવાના પાણીના સ્તર પર ગંભીર અસરો પડશે. વાંધાઓ અને લેખિત રજૂઆતોની નોંધ લેવાઇ કંપનીના સમર્થકો અને પર્યાવરણ પ્રેમીઓ વચ્ચે ચાલેલી દલીલોના કારણે લોકસુનાવણી દરમિયાન માહોલ તંગ બન્યો હતો. ઉચ્ચ વહીવટી અધિકારીઓએ બંને પક્ષોની દલીલો, વાંધાઓ અને લેખિત રજૂઆતોની નોંધ લીધી છે. હવે આ તમામ રજૂઆતો અને રિપોર્ટના આધારે પર્યાવરણ મંત્રાલય અને સ્થાનિક તંત્ર આગામી દિવસોમાં આ પ્રોજેક્ટ અંગે આખરી નિર્ણય લેશે.આ પણ વાંચો---- Gujarat Civic Body Update : તમારા શહેરમાં કોની લાગી લોટરી ? એક જ ક્લિક કરો તો ખુલી જશે રહસ્ય
Read Full Story arrow_forward