Rajnath Singh 2 દેશના પ્રવાસ માટે થયા રવાના, સૈન્ય અને દરિયાઈ સહયોગ વધારવા પર થશે ચર્ચા
ભારતના રક્ષા મંત્રી રાજનાથ સિંહ આજે સોમવાર (18 મે)થી બે દેશોના ચાર દિવસીય સત્તાવાર પ્રવાસે રવાના થયા છે. આ પ્રવાસનો મુખ્ય હેતુ ઈન્ડો-પેસિફિક વિસ્તારમાં શાંતિ અને સ્થિરતાને પ્રોત્સાહન આપવું, સૈન્ય સહકાર મજબૂત બનાવવો અને રક્ષા ઉદ્યોગોમાં ભાગીદારી વધારવાનો છે. પ્રવાસ પહેલા રાજનાથ સિંહે જણાવ્યું હતું કે ભારત સૈન્ય અને દરિયાઈ સહકારને વધુ મજબૂત બનાવવા પર ખાસ ધ્યાન આપશે. ઇન્ડો-પેસિફિક વિસ્તારમાં શાંતિ અને સ્થિરતા જળવાઈ રહે પ્રવાસના પ્રથમ તબક્કામાં રક્ષા મંત્રી 18 અને 19 મે દરમિયાન વિયેતનામની મુલાકાત લેશે. બંને દેશો વચ્ચેની ‘વ્યાપક વ્યૂહાત્મક ભાગીદારી’ના 10 વર્ષ પૂર્ણ થવાના અવસરે આ મુલાકાત મહત્વપૂર્ણ માનવામાં આવી રહી છે. તાજેતરમાં જ વિયેતનામના રાષ્ટ્રપતિના ભારત પ્રવાસ દરમિયાન આ ભાગીદારીને વધુ મજબૂત બનાવવામાં આવી હતી. રવાના થતા પહેલા સોશિયલ મીડિયા પ્લેટફોર્મ X પર રાજનાથ સિંહે લખ્યું હતું કે તેઓ વ્યૂહાત્મક સૈન્ય સહકારને વધુ ગાઢ બનાવવાના, રક્ષા ઔદ્યોગિક ભાગીદારી મજબૂત કરવાની અને ઇન્ડો-પેસિફિક વિસ્તારમાં શાંતિ અને સ્થિરતા જળવાઈ રહે તે માટે સમુદ્રી સહકાર વધારવાના મુદ્દાઓ પર ધ્યાન કેન્દ્રિત કરશે. રક્ષા ભાગીદારી વિઝન 2030 પર ચર્ચા વિયેતનામ પ્રવાસ દરમિયાન રાજનાથ સિંહ ત્યાંના રક્ષા મંત્રી જનરલ Phan Van Giang સાથે દ્વિપક્ષીય બેઠક કરશે. આ બેઠકમાં બંને દેશો વર્ષ 2022માં નક્કી કરાયેલા ‘રક્ષા ભાગીદારી વિઝન 2030’ હેઠળ આગળ વધવાની વ્યૂહરચના પર ચર્ચા કરશે. આ પહેલા વિયેતનામના રાષ્ટ્રપતિ To Lamએ 5થી 7 મે દરમિયાન ભારતની ત્રણ દિવસીય રાજકીય મુલાકાત લીધી હતી. વડાપ્રધાન મોદીના આમંત્રણ પર થયેલી આ મુલાકાતનો હેતુ બંને દેશો વચ્ચેના સંબંધોને ‘Enhanced Comprehensive Strategic Partnership’ના સ્તરે લઈ જવાનો હતો. વિયેતનામ બાદ દક્ષિણ કોરિયાની મુલાકાત વિયેતનામનો પ્રવાસ પૂર્ણ કર્યા બાદ રાજનાથ સિંહ 20 મેના રોજ સાઉથ કોરિયા માટે રવાના થશે અને 21 મે સુધી ત્યાં રહેશે. ભારતની ‘એક્ટ ઈસ્ટ પોલિસી’ અને દક્ષિણ કોરિયાની ‘ઈન્ડો-પેસિફિક સ્ટ્રેટેજી’ વચ્ચેનું સમન્વય બંને દેશોના સંબંધોમાં મહત્વપૂર્ણ માનવામાં આવે છે. સિયોલમાં પોતાના પ્રવાસ દરમિયાન રાજનાથ સિંહ દક્ષિણ કોરિયાના રક્ષા મંત્રી Ahn Gyu-back સાથે બેઠક કરશે અને પરસ્પર સહકારના નવા માર્ગો અંગે ચર્ચા કરશે. ઉપરાંત તેઓ ડિફેન્સ એક્વિઝિશન પ્રોગ્રામ એડમિનિસ્ટ્રેશન (DAPA)ના મંત્રી Lee Yong-cheol સાથે મુલાકાત કરશે અને ભારત-કોરિયા બિઝનેસ રાઉન્ડટેબલની અધ્યક્ષતા પણ કરશે. આ પણ વાંચો : ED એકશનમાં AAP નેતા દીપક સિંગલાની 155 કરોડના બેંક કૌભાંડમાં ધરપકડ
Read Full Story arrow_forward
