Vadodara: ટુંડાવ ખાતે નવીન રોડ તોડીને ગટર લાઇન નાખતા કામગીરી અટકાવાઇ
સાવલી તાલુકાના ટુંડાવ ગામે રૂા.15 લાખના ખર્ચે બનેલ નવીન રોડને તોડીને ગટરની પાઇપલાઇન નાખતા વિફ્રેલા ગ્રામજનોએ વિવિધ આક્ષેપ સાથે કામગીરી અટકાવતા પંચાયતની કામગીરી સામે સવાલો ખડા કર્યા છે. ટુંડાવ ગામે બે વર્ષ પહેલાં બનેલા આશરે રૂા.15 લાખના રોડને તોડી ગટર લાઈન નાખવાના નિર્ણય સામે ભારે વિરોધ જાગ્યો છે. ટુંડાવ ગામમાં ગટર લાઈન નાખવાના કામને લઈને ગ્રામજનો અને ગ્રામ પંચાયત વચ્ચે વિવાદ સર્જાયો છે. ગામના બસ સ્ટેન્ડ વિસ્તારમાં ગટર યોજનાનું કામ શરૂ કરાયું હતું. પરંતુ બે વર્ષ પહેલાં અંદાજે રૂા.15 લાખના ખર્ચે બનાવેલા રોડને જેસીબી વડે તોડીને પંચાયત દ્વારા બુધ્ધિનું પ્રદર્શન કરીને ગટર લાઈન નાખવાની કામગીરી શરૂ થતાં ગ્રામજનોએ ભારે વિરોધ કરીને કામ રોકાવ્યું હતું. આ બાબતે એડવોકેટ અનિલ રાણાએ જણાવ્યું હતું કે, અમે વિકાસના કામના વિરોધી નથી.પૂર્વ સરપંચ દ્વારા થોડા સમય પહેલાં જ ગામમાં આ રોડનું નિર્માણ કરાયું હતું. રોડ હજુ પણ સારી સ્થિતિમાં છે. છતાં યોગ્ય આયોજન વિના રોડ તોડીને ગટરનું કામ શરૂ કર્યું છે. તેનો અમારો વિરોધ છે. રોડ તોડવા કરતા રોડની સાઇડમાં અથવા અન્ય વૈકલ્પિક રીતે ગટર લાઇન નાખી શકાય તેમ છે. ભાજપ સરકારમાં વિકાસના વિવિધ કામો આવે છે અને થવાના છે. તેમાં અમારો સાથ સહકાર છે જ અને આપીશું.પરંતુ પંચાયત દ્વારા ભ્રષ્ટાચાર કરવા માટે નાણા આમતેમ વાપરી રહ્યાં છે.આ વિકાસ નથી વિનાશ છે તેવો આક્ષેપ કર્યો હતો. જ્યારે રોડ તોડી કામગીરી કરાતા લોકોમાં ભારે રોષ ફેલાયો હતો. રોડનો એક ભાગ તોડાયા બાદ ગ્રામજનો સ્થળ પર દોડી આવીને તાત્કાલિક કામ બંધ કરાવ્યું હતું.ગ્રામજનોએ સમગ્ર મામલે ઉચ્ચ સ્તરે તપાસ કરવાની અને જવાબદાર અધિકારીઓ તથા સંબંધિત લોકો સામે કાર્યવાહી કરવાની માંગ ઉઠાવી છે. હાલ માટે ગ્રામજનોના વિરોધને પગલે ગટરનું કામ સ્થગિત કરાયું છે. હવે આ મુદ્દે સંબંધિત તંત્ર આ મામલે શું નિર્ણય લે છે. તેના પર ગ્રામજનોની નજર મંડાઈ છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
