Lakhtar: ગ્રામ્યના સોલાર પ્લાન્ટમાં ચોરીને અંજામ આપનાર બે શખ્સો ઝડપાયા, 1 વોન્ટેડ
લખતરના તલસાણા ગામે સોલાર પ્લાન્ટમાં ચોરીની ઘટના બની હતી. જેમાં એલસીબી ટીમે ચોરીના મુદ્દામાલ, કાર, બાઈક, બે મોબાઈલ સહિત ગુજસીટોકના આરોપી સહિત બે શખ્સોને ઝડપી લીધા છે. ચોરીમાં હજુ 1 શખ્સ વોન્ટેડ છે.વધુમાં પ્રાપ્ત વિગતો મુજબ મુળ ભાવનગર જિલ્લાના ઘોઘા તાલુકાના નાના નવાગામના 27 વર્ષીય રાજદીપસિંહ પૃથ્વીરાજસિંહ ગોહીલ હાલ સુરેન્દ્રનગર શિવ હોટલ સામે આવેલ પંચવટી સોસાયટીમાં રહે છે. તેઓ લખતર તાલુકાના તલસાણા ગામે આવેલ અવાડા સનરાઈઝ એનર્જી પ્રા. લી.ના 300 મેગાવોટ સોલાર પ્લાન્ટમાં સીનીયર સીકયુરીટી એકઝીકયુટીવ તરીકે ફરજ બજાવે છે. તા. 25-4-26 અને તા. 11-5-26ના રોજ સોલાર પ્લાન્ટના એમસીઆર બીલ્ડીંગ પાછળ રાખેલ ઈલેકટ્રીક સામાનના કન્ટેનરમાંથી તાંબાની પ્લેટ અને કોપર વાયર ચોરાયો હતો. આ અંગે તપાસ કરાતા તસ્કરો 14.75 મીટરની 100 કિલો તાંબાની પ્લેટ અને 225 મીટર 140 કિલો વજનના કોપર વાયર મળી કુલ રૂપીયા 2,60,688ની મત્તા ચોરી કરી લઈ ગયા હતા. આથી રાજદીપસિંહ ગોહીલે તા. 12ના રોજ મોડી સાંજે લખતર પોલીસ મથકે અજાણ્યા શખ્સો સામે ચોરીની ફરિયાદ નોંધાવી હતી. આ ફરિયાદ નોંધાતા જ સુરેન્દ્રનગર એલસીબી પીઆઈ જે.જે.જાડેજાની સુચનાથી સ્ટાફ હરકતમાં આવ્યો હતો. અને સ્ટાફના અજયસિંહ, અશ્વીનભાઈ સહિતનાઓએ વોચ રાખી લખતર તાલુકાના ઝમર પાસેથી આ ચોરીને અંજામ આપનાર મુળ પાટડી તાલુકાના ગેડીયાનો અને હાલ સુરેન્દ્રનગરના સુવીધી એપાર્ટમેન્ટમાં રહેતા રોમીઝખાન મહોમદખાન મલેક અને મુળ ગેડીયાનો તથા હાલ સુરેન્દ્રનગર બસ સ્ટેશન પાછળ રહેતા અતીક ધરમશીભાઈ ચાણસ્માને ઝડપી લીધા હતા. આ બન્ને શખ્સો પાસેથી ચોરી થયેલ તાંબાની પ્લેટ, કોપર વાયર, કાર, બાઈક અને ર મોબાઈલ સહિત રૂપીયા 5,30,688નો મુદ્દામાલ કબજે કરાયો છે. ઝડપાયેલ રોમીઝખાન સામે ગુજસીટોક સહિત 16 ગુના ધ્રાંગધ્રા તાલુકા, બગોદરા તાલુકા, બજાણા, ચાંગોદર, હળવદ, સાણંદ, વિરમગામ રૂરલ, લખતર સહિતના પોલીસ મથકે નોંધાયેલ હોવાનું ખુલ્યુ છે. આ ચોરીમાં રાહુલ ધરમશીભાઈ ચાણસ્મા પણ સામેલ હોવાનું ખુલતા પોલીસ તેની શોધખોળ કરી રહી છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
