Community News & Updates

Stay informed with the latest happenings, achievements, and announcements from our community.

All News

calendar_today May 15, 2026

આર્થિક સ્થિરતા અને જનકલ્યાણનું સંતુલન

પશ્ચિમ એશિયામાં ઈરાન અને અમેરિકા વચ્ચેનું યુદ્ધ હાલ ભલે યુદ્ધ વિરામનાં નગારા વગાડી રહ્યું હોય પણ અંદરખાને એકબીજાને પછાડવાની અને ઈરાનને આર્થિક રીતે પાયમાલ કરવાની રમત ચાલુ જ રહી છે. ટ્રમ્પે હોર્મુઝની ખાડીની આસપાસ નાકાબંધી કરતા ઈરાનથી થતી ક્રૂડની નિકાસ ઠપ થઈ ગઈ છે અને ક્રૂડની સપ્લાય ચેન પડી ભાંગી છે. ટ્રમ્પે આ રીતે ઈરાનને આર્થિક રીતે પાયમાલ કરવા માગે છે પણ તેની અસર નાના મોટા તમામ દેશો પર એક યા બીજી રીતે પડી છે. ભારત પણ તેમાંથી બાકાત રહ્યું નથી. અને એટલે જ પીએમ મોદીએ દેશવાસીઓને પેટ્રોલ અને ડીઝલનો વપરાશ ઓછો કરવા, ખાતરનો વપરાશ 50 ટકા ઘટાડવા, કુદરતી ખેતીને અગ્રતા આપવા, એક વર્ષ સુધી જરૂર હોય કે ન હોય તો પણ સોનું નહીં ખરીદવાની અપીલ કરી છે. આની પાછળ પીએમ મોદીનો ઈરાદો દેશનાં કિંમતી વિદેશી હૂંડિયામણને બચાવવાનો છે. ઈરાન યુધ્ધ અને હોર્મુઝની ખાડીમાંથી જહાજોની અવરજવર ઠપ થઈ જવાને કારણે ભારતમાં ઈરાનથી આયાત કરવામાં આવતો ક્રૂડ ઓઈલનો જથ્થો ઘટી ગયો છે. અન્ય દેશોમાંથી લાંબા રૂટ પર ક્રૂડની આયાત કરવી પડે છે આને કારણે પેટ્રોલ તેમજ ડીઝલ અને અન્ય પેટ્રો પેદાશોની આયાત મોંઘી બની છે. આર્થિક સંતુલન જાળવવા તેમજ લોકો પર વધારે આર્થિક બોજો ન પડે તે માટે સરકાર દ્વારા પેટ્રેલ અને ડીઝલનાં ભાવમાં ફક્ત રૂ. 3નો વધારો કરવામાં આવ્યો છે. વિપક્ષોને જે જોઈતું હતું તે હોબાળો મચાવવાનું કારણ મળી ગયું છે. કોંગ્રેસનાં નેતા રાહુલ ગાંધીએ તો આવા નજીવા કારણોસર કેન્દ્રમાં ભાજપની સરકારને નિષ્ફ્ળ જાહેર કરી દીધી છે. કેન્દ્રનાં સંસદીય બાબતોનાં પ્રધાન કિરણ રિજિજુએ કહ્યું છે કે આખા વિશ્વમાં ઉર્જા સંકટ સર્જાયું છે ત્યારે ભારત સરકારે આર્થિક સ્થિરતા જાળવવા અને લોક કલ્યાણ વચ્ચે સંતુલન સાધવા પેટ્રોલ અને ડીઝલનાં ભાવમાં વધારો કર્યો છે. લોકોએ એ સમજવાની જરૂર છે કે ક્રૂડ ઓઈલનાં ભાવનાં ઘણા સમયથી વધારો થતો આવ્યો છે આમ છતાં સરકાર દ્વારા પેટ્રોલ અને ડીઝલનાં ભાવમાં વધારો કરવામાં આવ્યો નથી. વિશ્વનાં અનેક દેશોમાં ક્રૂડનાં ભાવ ઉછળતા પેટ્રોલ અને ડીઝલનાં ભાવમાં વૃધ્ધિ થઈ છે. કેટલાક દેશોમાં તેમાં 20 ટકાનો ભાવ વધારો કરાયો છે તો કેટલાક દેશોમાં 100 ટકા સુધીનો ભાવ વધારો કરાયો છે. જ્યારે ભારતમાં પેટ્રોલનાં ભાવમાં ફક્ત 3.2 ટકાનો અને ડીઝલનાં ભાવમાં 3.4 ટકાનો વધારો કરાયો છે. દેશ પર જ્યારે ચારે તરફથી સંકટ તોળાઈ રહ્યું હોય ત્યારે સરકારને તેનાં નિર્ણયોમાં સાથ આપવા અને તેનું પાલન કરવા સહકાર આપવો એ દરેક દેશવાસીની ફરજ છે. આપણે સરકારનાં નિર્ણયોને માથે ચઢાવીને દેશને આર્થિક સંકટમાંથી ઉગારવાનો છે. આવી જ પોસ્ટ વાંચવા માટે ક્લિક કરો

Read Full Story arrow_forward

calendar_today May 15, 2026

ક્રૂડનો બદલાતો મૂડ : 82 દેશોમાં કકળાટ

ભારતમાં પેટ્રોલ અને ડીઝલના ભાવમાં રૂ. 3 પ્રતિ લિટરનો વધારો સામાન્ય માણસ માટે ચોક્કસ ચિંતાનો વિષય બન્યો છે. ચાર વર્ષ પછી થયેલો આ વધારો એવા સમયમાં આવ્યો છે જ્યારે સમગ્ર વિશ્વમાં ઇંધણ બજાર ઉથલપાથલ થઈ રહ્યું છે. આ સમગ્ર સંકટ વચ્ચે ભારતે જે માર્ગ પસંદ કર્યો છે તે દુનિયાના ઘણા દેશોથી અલગ અને નોંધપાત્ર માનવામાં આવી રહ્યો છે. અનેક દેશોએ રેશનિંગ, ભારે ભાવવધારો અથવા ઈમરજન્સી નિયંત્રણો લાગુ કર્યા, જ્યારે ભારતે 'ઘબરાટ નહીં, સમજદારી'ની નીતિ અપનાવી છે. ક્રૂડ ઓઈલ એટલે જમીનની અંદર લાખો વર્ષોથી દબાયેલા જૈવિક પદાર્થોમાંથી બનેલું કુદરતી કાચું તેલ. તેને 'બ્લેક ગોલ્ડ' પણ કહેવામાં આવે છે. આ કાચા તેલને રિફાઈનરીમાં શુદ્ધ કર્યા પછી પેટ્રોલ, ડીઝલ, વિમાન ઇંધણ, એલપીજી, ડામર અને અનેક પેટ્રોકેમિકલ ઉત્પાદનો બનાવવામાં આવે છે. ક્રૂડ સામાન્ય રીતે જમીનની અંદર પથ્થરોની સ્તરો વચ્ચે અથવા દરિયાઈ તળિયામાં મળી આવે છે. વિશ્વમાં બેન્ચમાર્ક તરીકે 'બ્રેન્ટ ક્રૂડ' અને 'નાયમેક્સ' નામ બહુ ચર્ચાય છે. બ્રેન્ટ મુખ્યત્વે ઉત્તર સમુદ્રના તેલના ભાવ દર્શાવે છે, જ્યારે નાયમેક્સ અમેરિકન બજારનો મુખ્ય માપદંડ છે. વિશ્વભરમાં ક્રૂડના ભાવ નક્કી કરવામાં આ બંનેનો મોટો પ્રભાવ રહે છે. ભારત પોતાની જરૂરિયાતનું લગભગ 80 થી 85 ટકા ક્રૂડ આયાત કરે છે. એટલે કે દેશનો મોટો ભાગ વિદેશી તેલ પર નિર્ભર છે. ભારતમાં આસામ, ગુજરાત, રાજસ્થાન, મુંબઈ હાઈ અને કૃષ્ણા-ગોદાવરી બેસિન જેવા વિસ્તારોમાં થોડું સ્થાનિક ઉત્પાદન થાય છે, પરંતુ તે દેશની કુલ માંગ સામે ઘણું ઓછું છે. ભારત દર વર્ષે અંદાજે 230 થી 250 મિલિયન ટન ક્રૂડ આયાત કરે છે. સૌથી વધુ આયાત રશિયા, ઈરાક, સાઉદી અરેબિયા અને યુએઈમાંથી થાય છે. છેલ્લા બે વર્ષમાં રશિયાએ ભારત માટે સૌથી મોટો સપ્લાયર તરીકે સ્થાન મેળવ્યું છે, કારણ કે યુદ્ધ પછી તેણે ડિસ્કાઉન્ટેડ ક્રૂડ ઓફર કર્યું હતું. પ્રશ્ન એ છે કે ભારતે તરત જ મોટા ભાવવધારા કેમ ન કર્યા? જવાબ દેશની સામાજિક અને આર્થિક રચનામાં છુપાયેલો છે. ભારતમાં ઇંધણની માંગ 'પ્રાઈસ ઈનેલાસ્ટિક' ગણાય છે. એટલે કે ભાવ વધે છતાં લોકો તરત ઉપયોગ ઘટાડી શકતા નથી. ખેડૂતને ડીઝલ જોઈએ જ, ટ્રક ચાલકને વાહન ચલાવવું જ પડે, ઓટો ડ્રાઈવરને રોજગાર માટે પેટ્રોલ જોઈએ જ. જો સરકારે એકસાથે 200 કે 300 ટકા ભાવવધારો કર્યો હોત તો સૌથી વધુ અસર ગરીબ અને મધ્યમવર્ગ પર પડત. તેથી ભારતે 'વોલ્યુમ ઘટાડો, પરંતુ લોકોને આઘાત ન આપો' એવી નીતિ અપનાવી. સરકારી સૂત્રો મુજબ ક્રૂડના વૈશ્વિક ભાવ વધતા તેલ કંપનીઓને પ્રતિદિન લગભગ 1000 કરોડ રૂપિયાની અન્ડર-રિકવરી થઈ રહી હતી. પેટ્રોલ પર લગભગ રૂ. 26 અને ડીઝલ પર રૂ. 82 પ્રતિ લિટર જેટલો ખર્ચ વધી ગયો હોવા છતાં આખો ભાર ગ્રાહકો પર મૂકવામાં આવ્યો નહોતો. સરકારે અગાઉ એક્સાઈઝ ડયૂટીમાં પણ ઘટાડો કર્યો હતો જેથી સામાન્ય માણસને રાહત મળે. દુનિયાના ઘણા દેશોમાં સ્થિતિ ભારત કરતાં ઘણી કઠિન છે. યુએઈમાં કેટલાક વિસ્તારોમાં ઇંધણના ભાવમાં 52 ટકા સુધીનો વધારો નોંધાયો. અમેરિકામાં સરેરાશ 44 ટકા સુધી ભાવ વધી ગયા. યુરોપના અનેક દેશોમાં લોકો કલાકો સુધી પેટ્રોલ પંપ પર લાઈનમાં ઊભા રહેતા જોવા મળ્યા. કેટલાક દેશોએ રેશનિંગ શરૂ કર્યું, તો કેટલાકે લોકોને નિર્ધારિત માત્રાથી વધુ પેટ્રોલ ન આપવાનો નિર્ણય લીધો. શ્રીલંકા જેવા દેશોમાં અગાઉ લોકો દિવસો સુધી પેટ્રોલ માટે રાહ જોતા હતા. પાકિસ્તાનમાં પણ ઇંધણ સંકટે અર્થતંત્રને હચમચાવી દીધું હતું. ભારતનું વાર્ષિક ક્રૂડ આયાત બિલ અંદાજે 12 થી 15 લાખ કરોડ રૂપિયા સુધી પહોંચે છે. સાથે સાથે સોનાની આયાત પણ લગભગ 6 લાખ કરોડ સુધી પહોંચી ગઈ છે. સરકારનું માનવું છે કે ઓઈલ અને ગોલ્ડ બંને મળીને દેશના વિદેશી ચલણ પર ભારે દબાણ ઉભું કરે છે. તેથી વડાપ્રધાને લોકોને સ્વૈચ્છિક બચત માટે અપીલ કરી છે. તેમાં ઇંધણનો ઓછો ઉપયોગ, એક વર્ષ સુધી સોનાની ખરીદી ટાળવી અને બિનજરૂરી વિદેશ પ્રવાસ ઘટાડવા જેવી બાબતોનો સમાવેશ થાય છે. ભારતના ઘરોમાં અંદાજે 30,000 ટન સોનું હોવાનું માનવામાં આવે છે, જેની કિંમત લગભગ 5 ટ્રિલિયન ડોલર ગણાય છે. ભારતમાં આજે વાહનોની સંખ્યા જબરદસ્ત રીતે વધી રહી છે. અંદાજે 30 કરોડથી વધુ રજીસ્ટર્ડ વાહનોમાં મોટાભાગના પેટ્રોલ અને ડીઝલ આધારિત છે. તેમાં લગભગ 21 કરોડથી વધુ ટુ-વ્હીલર, કાર, ટ્રક અને બસોનો સમાવેશ થાય છે. ઈલેક્ટ્રિક વાહનોનો હિસ્સો હજુ પણ નાનો છે, પરંતુ ઝડપથી વધી રહ્યો છે. વિશ્વભરમાં અંદાજે 1.5 અબજથી વધુ વાહનો છે, જેમાંથી ઈલેક્ટ્રિક વાહનોનું પ્રમાણ હજુ પણ 5 થી 7 ટકા આસપાસ છે. એટલે કે દુનિયા હજુ પણ મોટા ભાગે ફોસિલ ફ્યુઅલ પર આધારિત છે. ભારતમાં દરરોજ આશરે 50 લાખ બેરલ જેટલું પેટ્રોલિયમ વપરાય છે. વિશ્વના મોટા ઇંધણ વપરાશકાર દેશોમાં અમેરિકા પ્રથમ ક્રમે છે. ત્યારબાદ ચીન અને ભારત આવે છે. અમેરિકામાં વ્યક્તિદીઠ વપરાશ ભારત કરતાં ઘણો વધારે છે, કારણ કે ત્યાં ખાનગી વાહનો પર ભારે નિર્ભરતા છે. ભારતમાં હજુ પણ જાહેર પરિવહન અને ટુ-વ્હીલરનો મોટો ઉપયોગ થાય છે, છેલ્લા દાયકામાં ક્રૂડના ભાવોમાં ભારે ચઢાવ-ઉતાર જોવા મળ્યા છે. 2008માં ક્રૂડ 147 ડોલર પ્રતિ બેરલ સુધી પહોંચ્યું હતું. કોરોના દરમિયાન તો માંગ ઘટતા ભાવ ઐતિહાસિક રીતે તૂટી પડયા હતા. પરંતુ યુદ્ધ, સપ્લાય વિક્ષેપ અને વૈશ્વિક અનિશ્ચિતતાએ ફરીથી બજારમાં ઉથલપાથલ મચાવી છે. ઈરાન-અમેરિકા તણાવ બાદ બ્રેન્ટ ક્રૂડ ફરી 100 ડોલર પ્રતિ બેરલ પાર ગયું હોવાનું બજાર નિષ્ણાતો કહે છે. આ સમગ્ર પરિસ્થિતિમાં ભારતની નીતિ દુનિયાને એક અલગ સંદેશ આપે છે. જ્યારે અનેક દેશોએ ભય અને કડક નિયંત્રણોનો માર્ગ પસંદ કર્યો, ત્યારે ભારતે લોકોમાં વિશ્વાસ રાખ્યો. સરકારે સીધા રેશનિંગ કરતાં 'સ્વૈચ્છિક બચત' પર ભાર મૂક્યો. આ અર્થતંત્ર અને સામાજિક સંતુલન વચ્ચેનો માર્ગ છે. ભાવ વધ્યા છે, લોકો પર બોજો પણ આવ્યો છે, પરંતુ હજુ સુધી ભારતે સંકટને 'ઘરઆંગણે આર્થિક આપત્તિ' બનવા દીધું નથી. આવી જ પોસ્ટ વાંચવા માટે ક્લિક કરો

Read Full Story arrow_forward

calendar_today May 15, 2026

ગંભીર લોકોનાં જીવનનો મંત્ર - હસના મના હૈ

બેન્જામિન ફ્રેન્કલિન, બસ નામ હી કાફી હૈ. 17 મી સદીમાં જ્ઞાનીઓની દુનિયામાં જેનો દબદબો હતો એવા અમેરિકન રાજદ્વારી,એક સફ્ળ વૈજ્ઞાનિક, લેખક અને પ્રકાશક કે જેણે પોતાના વિચારો થકી એક આગવી ઓળખ ઊભી કરી હતી.હમણાં થોડા દિવસો પહેલા એમનો એક ક્વોટ વાંચવા મળ્યો જેણે હૃદયને અંદર સુધી ખલેલ પહોંચાડી. મારી ખલેલનું પરિણામ એટલે આજનો આ લેખ. અમુક પજવણી શુભકારક હોય છે. મારી પજવણીનો ચેપ તમને લાગે અને તમને પણ મારી જેમ અંદર સુધી ખલેલ પહોંચે તો ભયોભયો. ચાલો તો મને ખલેલ આપતી અને મારા પછી તમને પણ ખલેલ પહોંચાડશે એવી વાત મારે તમને કહેવી છે. બેન્જામિન ફ્રેન્કલિને કહેલું કે, *ઘણાં લોકો પચીસ વર્ષની ઉંમરે જ મૃત્યુ પામ્યા હોય છે પણ છેક પંચોતેરમે વર્ષે લાકડાંભેગા થાય છે !* ઉઠામણાનાં ઓટલે બેસેલા લોકોને આના કરતાં મોટી લપડાક બીજી શું હોય શકે! જેનાં જીવનમાં ઉત્સાહ જ નથી અને જે બારેમાસ કારણ વગર મુરઝાઈ રહે છે એવાં લોકો માટે લાલબત્તી સમાન આ વાત છે. અમુક લોકોને જોવ તો તમને એવું જ લાગશે કે જાણે આખી દુનિયાનો ભાર એ જ ઉઠાવીને ચાલતાં હોય ! હાસ્ય નામનું તત્ત્વ જીવનમાં હોય એવી તો એમને જાણ સુધ્ધા નથી! એમના જીવનમાં નથી ઉત્સાહ નથી જીવનમાં કશુંક કરવાનાં ઉમંગ. આવા ન છૂટકે જીવતાં હોય એવાં લોકો સાથે જો કોઈ આનંદિત વ્યકિત ભટકાઈ જાય તો એ બિચારાનું તો આવી જ બને ! ગંભીરતાની જાણે ફ્રેન્ચાઇઝી લીધી હોય એવાં. આવા ગંભીર લોકોનાં જીવનનો એક મંત્ર છે અને એ છે *હસના મના હૈ*  જીવન માનીએ એટલું મુશ્કેલ નથી. સાવ સરળ છે. ઓસ્કાર વાઈલ્ડે એવું કહેલું કે જીવન એ ચર્ચા નો વિષય નથી બલકે કે જીવવાનો વિષય છે. અમુક સંજોગોને બાદ કરતાં વધારે પડતા ગંભીર રહેવાની જરૂર નથી. અમુક લોકો તો દુનિયા આખીનો ભાર લઈ ને ફ્રે છે.નવાઈ પમાડે એવી વાત તો એ છે કે એમની પાસે સુખી થવાનું કોઈ કારણ જ નથી ! કોઈ પાસે ઉધાર લાવીને ઉપયોગ કરતાં હોય એમ હાસ્યનો ઉપયોગ કરે છે.એમના સ્વજનો માટે તો એમનો હસ્તો ચહેરો જોવો એ પણ એક લાહવો જ સાબિત થતો હોય છે.જોવા જેવું તો એ છે કે આવા લોકોની કહેવાતી ગંભીરતાથી સમાજ અંજાય જાય છે અને એમને મેચ્ચોર માનવા માંડે છે ! આ તો દાઝેલા ઉપર દરાઝ જેવી પરિસ્થિત છે. જીવન એટલે ઉત્સવ. જેનાં જીવનમાં ઉત્સાહ અને ઉમંગ નથી એવા માણસને જીવિત સમજવાનો રિવાજ કાઢી નાંખવા જેવો છે. જે માણસ વધારે પડતો ગંભીર અને નિરુત્સાહી છે એવો માણસ જીવનને સમજવામાં કાચો છે એવું કહેવામાં કાંઈ જ અતિશયોકિત નથી. જેણે જીવનને સમજી લીધું છે એનાં માટે જીવનની દરેક ક્ષણ તહેવાર જેવી જ છે. અમુક પરિસ્થિત અને સંજોગો એવા હોય છે કે જે માણસને ગંભીર રહેવા માટે મજબૂર કરે છે. જોકે એ સમજી શકાય એવું છે પરંતુ ઉદાસીનતા અને નકારાત્મકતા જ સ્વભાવ બની જાય એ વાત નો સ્વિકાર કરી શકાય નહીં. આપણી ચર્ચાની ગંભીરતા એ છે કે આપણે જે ગંભીરતાની વાત કરી રહ્યાં છીએ એ ઉદાસીનતા, નિરઉત્સાહ અને નકારાત્મકતાનું પ્રતિનિધિત્વ કરે છે. આ બધી વાત આપણે માનીએ એટલી સરળ નથી.દરેક વ્યકિતની પરિસ્થિત જુદી હોય છે. સંજોગ નામનું તત્ત્વ માણસને મજબૂર કરે છે એ વાત પણ એટલી જ નક્કર છે.આ બધાને નજરઅંદાજ ન કરી શકાય. પરંતુ કહેવાનું તાત્પર્ય એટલો જ છે કે દરેક ઉંમરને પોતાની એક સુંદરતા હોય છે. જેમ બાળપણ પાસે પોતાની એક ભવ્યતા છે એમ યુવાની અને વૃદ્ધાવસ્થા પાસે પણ પોતાની કહી શકાય એવી ભવ્યતા છે. દરેક માણસે ઉંમર પ્રમાણે પોતાની ભૂમિકા ભજવવાની હોય છે. બેન્જામિન એવાં ઉદાસીન લોકોની વાત કરે છે જે ઉંમરે તો યુવાન છે પરંતુ જેનો સ્વભાવ વૃદ્ધો ને પણ શરમાવે એવો છે. બેન્જામિન આ કટાક્ષ દ્વારા એ યુવાનોને જાગૃત કરવાની વાત કરે છે જે ઉદાસીનતા અને નકારાત્મકતા નાં ખોળે જઈ ને બેસી ગયાં છે. ઈશ્વરે જીવન નામનો સાંથીયો દોરી આપ્યો છે એમાં રંગો તો આપણે પૂરવાનાં છે. માનવજીવન એ ઈશ્વર દ્વારા આપવામાં આવેલી અનમોલ ભેટ છે. આ ભેટનો ઉપયોગ કેવી રીતે કરવો એ માણસનાં હાથમાં છે. એક વાત નો પણ સ્વિકાર કરવો રહ્યો કે જીવન કેમ જીવવું એ અંગે સલાહ આપવાનું જેટલું સરળ છે એટલું જીવવાનું સરળ નથી. દરેક માણસનાં પ્રશ્નો અલગ અલગ છે. પરંતુ આ બધામાંથી નીકળવાનો રસ્તો લગભગ -લગભગ એક છે. અને તે છે જીવન માટેનો હકારાત્મક દ્રષ્ટિકોણ. મુશ્કેલી માંથી નીકળવાનું પ્રાથમિક પગલું હોય તો એ છે માણસે હકારાત્મક વિચારતા થવું પડશે.મનોવિજ્ઞાન કહે છે કે તમે જેવું વિચારો છો એવી જ પરિસ્થિતનું નિર્માણ થાય છે. જો તમે પોઝિટિવ વિચારશો તો આજે નહીં ચાર દિવસે પોઝિટિવ જ પરિણામ મેળવશો. નક્કી તમારે કરવાનું છે કે જીવનનાં પ્રશ્નોનો સામનો કેવી માનસિકતા થી કરવો છે. બેન્જામિનની વાતમાં જે 25 વર્ષ નાં વૃદ્ધ ની વાત કહી છે તે એ વૃદ્ધ છે જેમની ઉંમર ભલે યુવાનીનો નિર્દેશ કરતી હોય પરંતુ એની માનસિકતા એટલી વૃદ્ધ થકી ગઈ હોય કે જાણે એમની ઉંમર 75 વર્ષ જેવી જ લાગે. જો તમારી પરિસ્થિત પણ એવી જ હોય તો ચેતી જજો કારણ કે આવી ઉદાસીન માનસિકતાથી આપ ન કેવળ પોતાને જ નુકસાન કરો છો બલ્કી તમારી સાથે જોડાયેલ તમામ ને નુકસાન પહોચાડો છો. કહેવાય છે ને કે આજનાં માણસને બે રોટલી ઓછી ખાવા મળે તો ચાલે પરંતુ માનસિક શાંતિ જોઈએ છે. ઉદાસીન અને હંમેશા નેગેટિવ વિચારતો માણસ પોતે તો દુઃખી થાય જ છે સાથે બીજાને પણ દુઃખી કરે છે. સીધો નિયમ છે તરબૂચ માંથી તરબૂચનો જ રસ નીકળે એમાંથી કાંઈ સફ્રજનનો રસ ન નીકળે. એવી જ રીતે ઉદાસ અને માંદલો માણસ અન્યને ઉદાસી જ આપી શકે બીજુ કાંઈ ન આપી શકે. જીવન પાસે અનિશ્ચિતતા સિવાય બીજુ કાંઈ નથી. દરિયાની રીતે જેવું આ જીવન મૂઠ્ઠી માંથી ક્યારે સરકી જાય એ ખબર નહીં પડે. માટે મસ્તીથી જોમથી જીવી લેવું. ઉંમરનાં દરેક પડાવને મન ભરીને માણી લેવાં. મનમાં ભરીને જીવવવું એના કરતાં મન ભરીને જીવી લેવાની જ મજા છે.ઉતાર ચઢાવ તો આવે એનાથી નાસીપાસ થવાની જરૂર નથી. જો માણસે સદા યુવાન રહેવું હોય તો નીચે આપેલી થોડા મુદ્દા ને અનુસરવા. જેકે એમાં વધારો ઘટાડો કરી શકાય. (1) હંમેશા પોઝિટિવ જ વિચારવું,વ્યકિત હોય કે ઘટના એની હકારાત્મક બાજુ જ જોવી. આનાથી એક જુદી જ તાજગી મળે છે. (2) મન ચંગા તો કઠરોટ મે ગંગા. મનને સતત સારી વસ્તુમાં પરોવાયેલું રાખવું.જે ગમતું છે એ કરવું. જો પેઇન્ટિંગ કરવાનું ગમે તો એ કરવું,જો ટીવી જોવાનું ગમે તો ટીવી જોવું. (3) મન સાથે તન પણ મજબૂર હોવું જોઈએ. નિયમિત ચાલવું ઓછામાં ઓછો અડધો કલાક. શક્ય હોય તો કસરત પણ કરવી. આનાં કારણે શરીર અન મગજ બંને ફ્રેશ રહે છે. (4) સોશિયલ મીડિયાનો ઉપયોગ પ્રમાણમાં ઓછો કરવો. પોતાની જાતને ગમતી પ્રવૃત્તિ માં પોરવવી. (5) નકારાત્મક વિચારસરણી વાળા લોકોથી દૂર જ રહેવું. એ તમારી ઊર્જા ને બગાડે છે. (6) પોતાની ગમતી વ્યકિત સાથે સમય પસાર કરવો.ગમતું સંગીત સાંભળવું કે ગમતું વાંચવું. (7) સર્જનાત્મક લોકો સાથે રહેવું. રોજ નવું વિચારવું. જેને રોજ એક નવો વિચાર નથી આવતો તેને યુવાન કહી શકાય નહીં માટે રોજ કશુંક નવું વિચારતા રહેવું. (8) જીવનમાં વ્યસનને બાજુએ મૂકી એક શોખ રાખવો કે જે તમને કશુંક કરવા માટે સતત પ્રેરણા આપતો રહે.જેવાં કે ક્રિકેટ રમવું, સંગીત ગાવું - વગાડવું, કોઈપણ એક રમત રમવી. (9) દિવસમાં ઓછામાં ઓછી 30 મીનીટ તો મિત્રો સાથે વાત કરવી. શક્ય હોય એટલા વધુ મિત્રો બનાવો. (10) ધ્યાન કરો. જો આટલું કરશો તો પંચોતેર વર્ષે પણ તમે પચ્ચીસ વર્ષ જેવાં જ લાગશો. તમને તમારી યુવાની બરકરાર રહે એવી શુભકામનાઓ. આવી જ પોસ્ટ વાંચવા માટે ક્લિક કરો

Read Full Story arrow_forward