Gandhinagar: અલુવા-સાદરા બ્રીજનું લોકાર્પણ ન થતાં લોકોની ધીરજ ખુટી ગઈ
માણસા તાલુકાના અલુવા ગામથી ગાંધીનગર તાલુકાને જોડતો સાબરમતી નદી ઉપરનો બ્રિજ બની ગયો હોવા છતાં લોકાર્પણ કરાતું નથી. જેને પગલે હવે કંટાળેલા ગ્રામજનોએ પોતાની રીતે જ આ પુલ પરથી અવર-જવર ચાલુ કરી દીધી છે. છેલ્લા પાંચ વર્ષથી ગોકળ ગતિએ ચાલી રહેલો બ્રિજ હવે સંપૂર્ણ બનીને તૈયાર છે, તેમ છતાં વહીવટી તંત્ર લોકાર્પણ કરતું નથી ચોમાસું નજીક છે ત્યારે ઝડપથી આ બ્રિજ ચાલુ કરવામાં આવે તેવી માંગ ઉઠવા પામી છે.માણસા તાલુકા અને ગાંધીનગર તાલુકાને જોડતા સાદરા-અલુવા પુલના કામ શરૂ થયે પાંચ વર્ષ થઈ ગયા છે.ત્યારે હવે પુલનું કામ પૂર્ણ થયું હોવા છતાં તંત્રને તેના લોકાર્પણની તારીખ મળતી નથી. જેને લઈને અનેક વાહનચાલકો હેરાન-પરેશાન થઈ ગયા છે. માણસા અને ગાંધીનગરના તાલુકાના હજારો લોકો પુલના લોકાર્પણની રાહ જોઈ રહ્યા છે. જેને પગલે કંટાળીને થોડા દિવસથી ઘણા વાહનચાલકોએ લોકાર્પણની રાહ જોયા વગર પુલનો ઉપયોગ શરૂ કરી દીધો છે.પુલ સાથે જ પુલથી અલુવા ગામ સુધીનો રોડ પણ તૈયાર થયેલ છે. પરંતુ રોડ વચ્ચે 10 જેટલા વીજ પોલ આવતા હોવાથી આ રોડ પર પસાર થતા વાહનચાલકોને અકસ્માત થવાનો ભય સતાવી રહ્યો છે. છતાં તંત્ર દ્વારા કોઈ મોટી હોનારતની રાહ જોતા હોય તે રીતે વીજ પોલ હટાવવા માટે કોઈ કાર્યવાહી હાથ ધરવામાં આવી નથી. સાદરા અલુવા પુલ નીચે નદીમાં હાલ કાચો રસ્તો બનાવીને વાહન ચાલકો રેતીના ઢગલામાં મહામહેનતે વાહનો પસાર કરી રહ્યા છે. સ્થાનિક સ્વરાજ્યની ચૂંટણી પહેલાં પુલનું કામ પૂર્ણ થયું હતું. પરંતુ આચાર સંહિતાને પગલે લોકાર્પણ પાછું ઠેલવામાં આવ્યું હતું. હવે આચાર સંહિતા પૂર્ણ થઈ હોવા છતાં તંત્રમાં પુલના લોકાર્પણનો કોઈ સડવડાટ દેખાતો નથી. જેને ગ્રામજનોની ધીરજ ખુટતાં લોકાર્પણ વગર જ તેનો ઉપયોગ શરૂ કરી દેવાયો છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
