Ahmedabad: મેઘાણીનગરમાં AMCએ ખાડો ખોદ્યા બાદ મૂકેલા બેરિકેડ્સ જીવલેણ બન્યા
શહેરના મેઘાણીનગર વિસ્તારમાં સિવિલ રોડ પર વહીવટી તંત્રની ગંભીર બેદરકારી સામે આવી છે. રસ્તાની બાજુમાં કરવામાં આવેલા ખોદકામ બાદ તેને યોગ્ય રીતે સુરક્ષિત કરવામાં ન આવતા સ્થાનિકો અને રાહદારીઓમાં ભારે રોષ જોવા મળી રહ્યો છે. સ્થાનિકોએ જણાવ્યું હતું કે સિવિલ રોડ પર ગટર લાઈન નાખવા માટે મોટો ખાડો ખોદવામાં આવ્યો છે. આ ખાડામાં કોઈ પડી ન જાય તે હેતુ થી લોખંડના પતરા લગાવાયા હતા. જે વેરવિખેર હાલતમાં જોવા મળી રહ્યા છે. કેટલાક પતરા ખાડામાં જ પડી ગયા છે, જેના કારણે સુરક્ષા માટેનું કોઈ સાધન ત્યાં કાર્યરત નથી. મહત્ત્વનું છે કે આ બેરિકેડ્સ પડી ગયા છતાં તંત્ર દ્વારા કોઈ પણ પ્રકારની તસ્દી લેવામાં આવી નથી.આ વિસ્તારમાં સતત અવરજવર રહેતી હોવાથી રાત્રિના સમયે કોઈ વાહનચાલક કે રાહદારી આ ખુલ્લા ખાડામાં ખાબકે તેવી પૂરેપૂરી શક્યતા છે. ખાસ કરીને નાના બાળકો અને વડીલો માટે આ સ્થિતિ જીવલેણ સાબિત થઈ શકે છે. પતરાના તીક્ષ્ણ છેડા બહારની તરફ્ હોવાથી પણ ઈજા થવાનું જોખમ રહેલું છે. સ્થાનિકોનું કહેવું છે કે તંત્ર દ્વારા કામ તો શરૂ કરવામાં આવે છે પરંતુ તંત્ર દ્વારા પૂરતું ધ્યાન ન અપાતું હોવાથી લોકોની સુરક્ષાને નેવે મૂકવામાં આવે છે. બેરિકેડિંગ એવી રીતે કરાયું છે કે તે પોતે જ એક મોટું જોખમ બની ગયું છે. લોકોની માંગ છે કે મ્યુનિસિપલ કોર્પોરેશન અથવા સંબંધિત વિભાગ આ મામલે તાકીદે હસ્તક્ષેપ કરે અને યોગ્ય બેરિકેડિંગ કરી કામ વહેલી તકે પૂર્ણ કરે જેથી કોઈ મોટી દુર્ઘટના સર્જાતા અટકી શકે છે. હાટકેશ્વર બ્રિજ પાસે બેરિકેડ્સ ધરાશાયી થયા ખોખરાથી હાટકેશ્વરને જોડતા વિવાદિત અને જર્જરિત બ્રિજ પાસે સુરક્ષાના કારણોસર મુકવામાં આવેલા લોખંડના બેરિકેડ્સ (પતરા) રસ્તા પર ધરાશાયી થયા હોવાની ઘટના સામે આવી છે. બંધ પડેલા આ બ્રિજની આસપાસ લોકોની અવરજવર રોકવા માટે આ આડશ મુકવામાં આવી હતી, પરંતુ તેના નબળા જોડાણ અથવા પવનના કારણે તે જમીન દોસ્ત થઈ ગયા છે. મહત્વનું છે કે વ્યસ્ત ગણાતા આ વિસ્તારમાં બેરિકેડ્સ પડવાને કારણે ટુ-વ્હીલર અને અન્ય વાહનોને પસાર થવામાં મુશ્કેલી પડી રહી છે. સ્થાનિકોનું કહેવું છે કે બ્રિજની કામગીરી એ તો ખુબ હેરાન કર્યા પરંતુ હવે જે સુરક્ષા વ્યવસ્થા છે તેની પણ જાળવણી કરાતી નથી. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
