Bharuch : જંબુસરમાં નર્મદા નિગમની ઘોર બેદરકારી, નહેરનું સાયફન તૂટતા ખેતરોમાં ફરી વળ્યા પાણી
ભરૂચ જિલ્લાના જંબુસર તાલુકામાંથી ખેડૂતોની ચિંતામાં વધારો કરતા સમાચાર સામે આવી રહ્યા છે. તાલુકાના ડાભા અને વેડચને જોડતા માર્ગ પર નર્મદા નિગમની નહેરનું સાયફન તૂટી પડતા હજારો લિટર પાણીનો વ્યય થયો છે. નહેરના પાણી ખેતરોમાં ઘૂસી જતાં ખેડૂતોની મહિનાઓની મહેનત પર પાણી ફરી વળ્યું છે અને લાખો રૂપિયાનું આર્થિક નુકસાન વેઠવાનો વારો આવ્યો છે.ખેડૂતોની વાડીઓમાં વિનાશના દ્રશ્યો ડાભા-વેડચ માર્ગ પર આવેલી નર્મદા નિગમની નહેરનું સાયફન નંબર 1866.05 તૂટવાને કારણે આસપાસના ખેતરો જળબંબોળ થઈ ગયા છે. ખેડૂત હનીફ પટેલની વાડીમાં રોપેલી 300 જેટલી આંબાની કલમો પાણી ભરાવાને કારણે સુકાઈ ગઈ છે. તેવી જ રીતે કંકુ માસીની ડેરી પાસેના ખેતરમાં પણ 250 થી 300 લેબીના છોડ તેમજ બીલી અને આંબાના ઝાડ નાશ પામ્યા છે. ખેડૂતોએ રાત-દિવસ એક કરીને ઉછેરેલા છોડ નષ્ટ થતા ખેડૂત આલમમાં આક્રંદ જોવા મળી રહ્યો છે. તંત્રની નિંભરતા સામે ભારે રોષ સ્થાનિક ખેડૂતોનો આક્ષેપ છે કે નહેરની બિસ્માર હાલત અંગે અનેકવાર રજૂઆતો કરવામાં આવી હતી, તેમ છતાં નર્મદા નિગમના અધિકારીઓએ આ બાબતે આંખ આડા કાન કર્યા છે. અધિકારીઓ એસી ઓફિસમાં બેસી રહે છે અને સ્થળ પર તપાસ કરવા સુદ્ધાં આવતા નથી. એક તરફ ખેડૂતો સિંચાઈના પાણી માટે તરસતા હોય છે, ત્યારે બીજી તરફ તંત્રની લાપરવાહીને કારણે હજારો લિટર પાણી વેડફાઈ રહ્યું છે. તાત્કાલિક ધોરણે નહેરનું સમારકામ થાય અસરગ્રસ્ત ખેડૂતોએ માંગ કરી છે કે તંત્ર તાત્કાલિક ધોરણે નહેરનું સમારકામ હાથ ધરે અને જે ખેડૂતોને મોટું આર્થિક નુકસાન થયું છે તેમને વળતર ચૂકવવામાં આવે. જો વહેલી તકે કાર્યવાહી નહીં થાય તો ખેડૂતોએ ઉગ્ર આંદોલનની ચીમકી પણ ઉચ્ચારી છે.આ પણ વાંચો--- Ahmedabad : 34 વર્ષ પછી કબરમાંથી બોલી લાશ, વટવાના જે મકાનને લોકો ભૂતિયુ માનતા હતા ત્યાંથી ખુલ્યું મર્ડર મિસ્ટ્રીનું રહસ્ય!
Read Full Story arrow_forward
