Panchmahal: ગૌચરની જમીનમાં ગેરકાયદે ખોદકામ કરી મોટાપાયે થતી માટીની ચોરી
કાલોલ તાલુકાના વરવાળા પંચાયતમાં ગેરકાયદે ચાલતા ઈંટોના ભઠ્ઠા બાબતે અવારનવાર ફરિયાદો ઉઠતી રહે છે, પરંતુ જવાબદાર અધિકારીઓ દ્વારા તેમની સામે ક્યારેય અસરકારક પગલાં લેવાયા નથી. જે મધ્યે તાજેતરમાં વરવાળા ગામમાં વધુ એક વખત ગૌચર જમીનને ખોદી નાખીને માટી ચોરીની ફરિયાદ ઉઠવા પામી છે.વરવાળા ગામના સ્થાનિક ખેડૂતોના જણાવ્યા અનુસાર પંચાયતમાં ખુલ્લેઆમ ગૌચરની જમીન ખોદીને તેની માટી ઇંટો બનાવવા ભઠ્ઠાવાળાઓ ચોરી રહ્યા છે. જે પૈકી બે વીઘા જેટલી જમીનમાં પાંચ ફૂટ કરતા ઊંડું ખોદકામ થઇ ગયું હોવાનું પણ સામે આવ્યું છે. આટલી વિપુલ માત્રામાં ગૌચર જમીનમાં માટી ખનન કરાયું, ત્યાં સુધી સરપંચ અને તલાટી અજાણ હોવાનું જાણવા મળે છે. સરકારી ગૌચર જમીનમાંથી માટી ચોરાતી હોવાને પગલે ગામ લોકોએ તલાટીને જાણ કરી ત્યારે તલાટીની ઊંઘ ઉડી હતી અને માટી ચોરી કરતા તત્વોને નોટિસ આપી સંતોષ માન્યો હતો. તેનાથી વધુ કોઈ પગલાં લેવાયા નથી. ઉલ્લેખનીય છે કે, ગામની આસપાસ આવી સો એકર જમીનમાં ખોદકામ કરી માટી ચોરી થઈ હોવાનું સ્થાનિકો જણાવી રહ્યા છે. ચોમેર થયેલા માટી ખનનને પગલે ખેડૂતોને તેમના ખેતરમાં જવું આવવું પણ મુશ્કેલ બની ગયું છે. જેથી અહીં ખુલ્લેઆમ ધમધમતા ગેરકાયદે ભઠ્ઠાઓ અને માટી ખનન કરતા તત્વો સામે અસરકારક કાર્યવાહી કરવા સ્થાનિક ખેડૂતોએ માંગ કરી છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
