Dabhoi: ડભોઇના કનાયડા - ગામડી રેલવે ઓવરબ્રિજ પર ખાડાનું સામ્રાજ્ય
ડભોઇથી ચાણોદ, રાજપીપળા અને પ્રસિદ્ધ યાત્રાધામ પોઈચાને જોડતા મુખ્ય માર્ગ પર કનાયડા ગામડી પાસે આવેલો રેલવે ઓવરબ્રિજ હાલ વાહનચાલકો માટે આશીર્વાદને બદલે આફત સમાન બન્યો છે, બ્રિજ ઉતરતી વખતે જ હાઈવે પર પડેલા વિશાળ ખાડાઓના કારણે અકસ્માતની વણઝાર સર્જાઈ રહી છે, છતાં સ્ટેટ હાઈવે વિભાગ તેના સામે આંખ આડા કાન કરી રહ્યો છે. આ રોડ પરથી રોજના હજારો પ્રવાસીઓ પસાર થાય છે,જેમના માટે આ સફર જોખમી બની રહી છે. આ રોડ ગુજરાતના પ્રવાસન માટે પણ અત્યંત મહત્વનો છે, ડભોઇથી રાધિકા તરફ જતો આ માર્ગ ચાણોદ, રાજપીપળા અને પોઈચાને જોડે છે. રોજ હજારોની સંખ્યામાં નાની-મોટી ગાડીઓ અને પ્રવાસીઓની બસો અહીંથી પસાર થાય છે. રાત્રિ દરમિયાન પૂરતી લાઈટના અભાવે વાહનચાલકોને આ ખાડા દેખાતા નથી, જેના કારણે અચાનક બ્રેક મારતા પાછળ આવતા વાહનો અથડાવા કે ગાડી પલટી ખાવાના બનાવો બની રહ્યા છે. બ્રિજ પરથી પૂરઝડપે ઉતરતી ગાડી જો અચાનક આ મોટા ખાડામાં ખાબકે, તો ટાયર ફાટવા અથવા બેલેન્સ બગડવાથી મોટી જાનહાનિ થઈ શકે છે. રોષે ભરાયેલા વાહન ચાલકો દ્વારા તાકિદે આ સમસ્યાના નિરાકરણની માંગ કરાઈ રહી છે. સ્થાનિક રહીશો અને વાહન ચાલકોની માંગ છે કે, સ્ટેટ હાઈવેના અધિકારીઓ તુરંત સ્થળ મુલાકાત લે બ્રિજની આસપાસના તમામ જીવલેણ ખાડાઓનું પેચવર્ક કરવામાં આવે, ભવિષ્યમાં આવા ખાડા ન પડે તે માટે કાયમી ધોરણે રસ્તાનું રિસફ્રેસિંગ કરાય, ચોમાસા પહેલા જો આ ખાડાઓ પૂરવામાં નહીં આવે, તો વરસાદમાં સ્થિતિ વધુ બદતર બનશે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
