Sayla: ચિત્રાલંક ગામની સીમમાં કાર્બોસેલના ગેરકાયદે ખનન પર પોલીસનો દરોડો
સાયલા તાલુકાના ખનીજ પ્રભાવીત વિસ્તારોમાં તંત્રના લાગલગાટ દરોડાઓ બાદ પણ ગેરકાયદે ખોદકામ કરતા ખનીજ માફીયાઓ સુધરવાનું નામ લેતા ના હોય તેમ ધોળા દિવસે પણ ખનીજ ઉલેચવાના ચાલી રહેલા કારસ્તાન પર પોલીસે ઓચિંતો છાપો મારતાં ચિત્રાલંક ગામની સીમ માંથી કોલસાના બે કુવા ઝડપી લીધા હતા. પોલીસે સ્થળ પરથી કુલ રૂ. પાંચ લાખનો મુદ્દામાલ જપ્ત કર્યો હતો. અત્રે ઉલ્લેખનીય છે કે ચાલુ મહિનામાં તંત્ર દ્વારા તાલુકા ગ્રામ્યના ઇશ્વરીયા, ચોરવીરા તેમજ ચિત્રાલંક ગામેથી કાર્બોસેલની ખનીજ ચોરી પર સતત કાર્યવાહી ચાલુ રાખી હોવા છતા બજારમાં કોલસાના વધેલા ભાવને કારણે ખનીજ ચોરો ગેરકાયદે ખનન કરી રહ્યા હોવાની સ્થિતી જોવા મળી રહી છે.સાયલા તાલુકા ગ્રામ્યમાં પેટ્રોલિંગ કરી રહેલ ઇન્ચાર્જ પોલીસ ઇન્સ્પેક્ટર ડી.ડી.ચુડાસમા તથા તેમની સાથે રહેલ ટીમે પૂર્વ બાતમીના આધારે ચિત્રાલંક ગામની સીમમાં ધોળા દિવસે ધમધમતા કોલસો ઉલેચવાના કારસ્તાન પર દરોડો પાડતા સ્થળ પર હાજર શખ્સો માં નાસભાગ મચી જવા પામી હતી.સ્થાનિક પોલીસ ની ટીમે કરેલ આકસ્મિક કાર્યવાહીમાં ગેરકાયદે કાર્બોસેલ ખનીજના ખનન સ્થળ પરથી બે કુવાઓ ઝડપી લેવાયા હતા.તંત્ર દ્વારા આ સાથે કૂવા પર લગાવેલી ચરખીઓ, બે બાઇક,એક ટ્રેક્ટર સહિત નો મુદ્દામાલ જપ્ત કરતા સુરેન્દ્રનગર ખાણ ખનીજ વિભાગને જાણ કરી હતી. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
