Bullet Train : અમદાવાદ-મુંબઈ વચ્ચે દોડનારી બુલેટ ટ્રેનનો ફર્સ્ટ લુક આવ્યો સામે, રેલ્વે મંત્રાલયે તસવીર શેર કરી
ભારતમાં પ્રથમ હાઈ-સ્પીડ બુલેટ ટ્રેનને લઈને મોટી અપડેટ સામે આવી છે. ભારતીય રેલવેના ઈતિહાસમાં નવા અધ્યાયની શરૂઆત કરતા મુંબઈ-અમદાવાદ હાઈ-સ્પીડ રેલ કોરિડોર (MAHSR) પ્રોજેક્ટની તસવીર રેલ મંત્રાલયના ગેટ નંબર 4 પર પ્રદર્શિત કરવામાં આવી છે, જે સામાન્ય નાગરિકોનું ધ્યાન ખેંચી રહી છે. આ પ્રોજેક્ટ અંતર્ગત 508 કિમી લાંબા રૂટ પર બુલેટ ટ્રેન 320 કિમી પ્રતિ કલાકની ઝડપે દોડશે. 2 કલાકમાં મુસાફરી થશે પૂર્ણ જેના કારણે મુંબઈથી અમદાવાદની મુસાફરી માત્ર 2 કલાકમાં પૂર્ણ થઈ જશે. હાલ આ મુસાફરીમાં લગભગ 6થી 8 કલાક લાગે છે. આ પ્રોજેક્ટને જાપાનની ટેકનિકલ અને આર્થિક સહાયથી આગળ વધારવામાં આવી રહ્યો છે. પ્રસ્તાવિત રૂટ પર કુલ 12 સ્ટેશનો હશે, જેમાં મુંબઈ, ઠાણે, વિરાર, બોઈસર, વાપી, બિલીમોરા, સુરત, ભરૂચ, વડોદરા, આણંદ, અમદાવાદ અને સાબરમતીનો સમાવેશ થાય છે. બુલેટ ટ્રેનમાં ભૂકંપ પ્રતિરોધક ડિઝાઇન અને આધુનિક સિગ્નલિંગ સિસ્ટમ જેવી વર્લ્ડ ક્લાસ સુવિધાઓ હશે. 2017માં પ્રોજેક્ટની શરૂઆત કરાઈ હતી કેન્દ્રીય રેલ મંત્રી અશ્વિની વૈષ્ણવે તાજેતરમાં પ્રોજેક્ટની સમીક્ષા કરતા જણાવ્યું હતું કે આ ભારતને વિકસિત દેશ બનાવવા દિશામાં મહત્વપૂર્ણ પગલું છે. હાલમાં સુરત, વડોદરા અને અમદાવાદમાં વાયડક્ટ, બ્રિજ અને સ્ટેશનનું કામ ઝડપી ગતિએ ચાલી રહ્યું છે. આ પ્રોજેક્ટની શરૂઆત 2017માં વડાપ્રધાન નરેન્દ્ર મોદી અને તત્કાલીન જાપાનના વડાપ્રધાન શિન્જો આબે દ્વારા અમદાવાદમાં શિલાન્યાસ કરીને કરવામાં આવી હતી. શરૂઆતમાં 2023 સુધી પૂર્ણ કરવાનો લક્ષ્ય હતો, પરંતુ કોરોના મહામારી અને અન્ય પડકારોને કારણે હવે 2027-28 સુધી કાર્ય પૂર્ણ થવાની શક્યતા છે. રાષ્ટ્રીય હાઈ સ્પીડ રેલ કોર્પોરેશન લિમિટેડ (NHSRCL) દ્વારા આ પ્રોજેક્ટનું કામ ચાલી રહ્યું છે. મુંબઈમાં અંડરગ્રાઉન્ડ સ્ટેશન અને દરિયા નીચે ટનલનું કામ પણ ઝડપથી આગળ વધી રહ્યું છે. આ પણ વાંચો : UP: રસ્તા પર નમાજને મંજૂરી નહીં..CM યોગી આદિત્યનાથની કડક ચેતવણી
Read Full Story arrow_forward
