Padra: પાદરા નગર નાગરિક સહકારી બેંક લિમિટેડની શાંતિપૂર્ણ ચૂંટણી સંપન્ન
પાદરા નગર નાગરિક સહકારી બેંક લિમિટેડની અત્યંત મહત્વપૂર્ણ ચૂંટણી આજે શાંતિપૂર્ણ માહોલમાં પૂર્ણ થઈ હતી. લાંબા સમય બાદ યોજાયેલી આ ચૂંટણીમાં મતદારોમાં ખાસ્સો ઉત્સાહ જોવા મળ્યો હતો. મોટા પ્રમાણમાં મતદાન નોંધાયું હતું. બેંકના સંચાલન માટે કુલ 15 ડિરેક્ટરોની પસંદગી માટે ચૂંટણી યોજાઈ હતી. જેમાં 2 મહિલા બેઠકો અને 12 સામાન્ય બેઠકોનો સમાવેશ થાય છે. જ્યારે એક એસસી/એસટી બેઠક બિનહરીફ જાહેર થતાં 14 બેઠકો માટે ચૂંટણી યોજાઈ હતી. કુલ 12,089 નોંધાયેલા મતદારોમાંથી અંદાજે 400 જેટલા ડિફેલ્ટર મતદારોને લોન બાકી હોવાના કારણે મતદાનથી વંચિત રાખ્યા હતા. જ્યારે 357 સભા સદ મતદારોએ મતદાન કર્યુ હતું. પરિણામે બાકી રહેલા મતદારોમાંથી સારો પ્રતિસાદ મળતા નોંધપાત્ર ટકા મતદાન નોંધાયું હતું. મતદાન પ્રક્રિયા સવારે 8 વાગ્યે શરૂ થઈ હતી. પાદરાની ઝેન સ્કૂલ ખાતે પાંચ અલગ-અલગ બૂથ પર મતદાન યોજાયું હતું. વહેલી સવારથી જ મતદારો, ઉમેદવારોના ટેકેદારો અને કાર્યકરો મોટી સંખ્યામાં મતદાન મથકે ઉમટી પડયા હતા, જેના કારણે સમગ્ર વિસ્તાર ચૂંટણીમય બની ગયો હતો. ચૂંટણી પ્રક્રિયા ચૂંટણી અધિકારી જીગરભાઈ પંડયા, સુર્યકાંતભાઈ પટેલ તથા મદદનીશ ચૂંટણી અધિકારી મનહરભાઈ પટેલ તેમજ સ્ટાફ્ના માર્ગદર્શન હેઠળ સુચારુ રીતે પાર પડી હતી. કોઈ અનિચ્છનીય બનાવ ન બને તે માટે પાદરા પોલીસ દ્વારા પીઆઇ વિજય ચારણના માર્ગદર્શન હેઠળ ચુસ્ત બંદોબસ્ત ગોઠવાયો હતો. આ ચૂંટણીમાં મુખ્ય મુકાબલો ભાજપ પ્રેરિત પાદરાના ધારાસભ્ય ચૈતન્યસિંહ ઝાલા સમર્થિત બેંક હિત રક્ષક પેનલ અને પરિવર્તન પેનલ વચ્ચે રહ્યો હતો. બંને પેનલના ઉમેદવારો દ્વારા જોરદાર પ્રચાર કરાતા ચૂંટણી જંગ રસપ્રદ બન્યો હતો. મતદાન પૂર્ણ બાદ હવે આવતીકાલે સવારે મતગણતરી હાથ ધરવામાં આવશે, જેને લઈ ઉમેદવારો તથા સમર્થકોમાં ઉત્સુકતા જોવા મળે છે. સમગ્ર પાદરા શહેરનું ધ્યાન હવે પરિણામ પર કેન્દ્રિત થયું છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
