Surendranagar : કાશીપરા ગામે ખેતરની વાડ સળગાવવા જેવી નજીવી બાબતે બે જૂથો વચ્ચે ધીંગાણું, 7 લોકો લોહીલુહાણ
સુરેન્દ્રનગર જિલ્લામાં કાયદો અને વ્યવસ્થાની સ્થિતિ જાણે કથળી રહી હોય તેમ એક જ દિવસમાં હિંસાની બીજી મોટી ઘટના સામે આવી છે. વઢવાણના ફૂલગ્રામમાં થયેલી હત્યાની શાહી હજુ સુકાઈ નથી ત્યાં સાયલા તાલુકાના કાશીપરા ગામે ખેતરની વાડ સળગાવવા જેવી નજીવી બાબતે એક જ સમાજના બે પરિવારો વચ્ચે સશસ્ત્ર ધીંગાણું સર્જાયું હતું. આ જૂથ અથડામણમાં 5 મહિલાઓ સહિત કુલ 7 લોકોને ગંભીર ઇજાઓ પહોંચતા સમગ્ર પંથકમાં ચકચાર મચી ગઈ છે.શું હતી અથડામણની પાછળની કડી? પ્રાપ્ત વિગતો અનુસાર, કાશીપરા ગામે ભાગવા રાખેલા એક ખેતરની વાડ બે દિવસ પહેલા સળગાવવામાં આવી હતી. આ મુદ્દે આજે બપોરના સમયે બંને પક્ષો વચ્ચે ઉગ્ર બોલાચાલી થઈ હતી, જે જોતજોતામાં હિંસક અથડામણમાં ફેરવાઈ ગઈ હતી. બંને જૂથના લોકો લાકડીઓ અને ધારદાર હથિયારો સાથે સામસામે આવી ગયા હતા. ઇજાગ્રસ્તોના જણાવ્યા મુજબ, હુમલો કરનાર નટુ મેણીયા નામનો શખ્સ ઘટના બાદ ફરાર થઈ ગયો છે. ઇજાગ્રસ્તોની હાલત અને પોલીસ કાર્યવાહી આ લોહિયાળ સંઘર્ષમાં ઘાયલ થયેલા સાત લોકો પૈકી એક મહિલા અને તેના પતિની હાલત ગંભીર જણાતા તેમને તાત્કાલિક સુરેન્દ્રનગર સિવિલ હોસ્પિટલ ખાતે રિફર કરવામાં આવ્યા છે. જ્યારે અન્ય પાંચ ઇજાગ્રસ્તોને સાયલાની સરકારી હોસ્પિટલમાં પ્રાથમિક સારવાર આપવામાં આવી રહી છે. ઘટનાની જાણ થતા જ હોસ્પિટલ પરિસરમાં લોકોના ટોળેટોળા ઉમટી પડ્યા હતા. પોલીસે તપાસ શરુ કરી સાયલા પોલીસે ઇજાગ્રસ્તોના નિવેદનો નોંધવાની પ્રક્રિયા હાથ ધરી છે. જોકે, સાંજ સુધી આ મામલે સત્તાવાર રીતે કોઈ પોલીસ ફરિયાદ નોંધાઈ નથી, પરંતુ પોલીસે હુમલાખોરોને ઝડપી પાડવા માટે ચક્રો ગતિમાન કર્યા છે. નાના એવા કાશીપરા ગામમાં બનેલી આ ઘટનાએ ગ્રામીણ વિસ્તારોમાં સુરક્ષા સામે પ્રશ્નાર્થ ચિન્હ ઉભું કર્યું છે.આ પણ વાંચો---- Gandhinagar : અધિકારીઓ બેલગામ? ધારાસભ્યોને પણ નથી ગણતા! વિધાનસભાની કમિટીમાં કરી ફરિયાદ
Read Full Story arrow_forward
